Tarombo Nami

Mansai arga do tarombo diangka halak na radot diangka partuturon, godang do natua-tua naso apala tangkas diboto tarombona, tarlumobi ma di pangarantoan on, sipata molo sunungkun angka dongan tubu niba adong do nasoumboto nomorna dohot tarombona. jadi molo adang namasa dinasida lasniroha manang arsakniroha, gabe susado mangalului sisolhotna, sipata oloma gabe sihataan ala umbotoan do halak ditarombo niba daripada iba sandiri. Alani i do hita angka natua tua porlu paboahan tarombonta tu angka ianakkon ta tarlumobi ma dipangarantoan on, asa molo adang namasa pintor diboto angka tutur na. 

SELENGKAPNYA...

Sinamot Sitombol dohot Rambu Pinudun

Post ini kami ambil dari tulisan almarhum St.D.P Hutagalung (Op ni Si Salomo):

http://purbatondangmargana.blogspot.com/2008/09/catatan-adat-na-ta-baen-di-jakarta.html
http://purbatondangmargana.blogspot.com/2008/10/usul-adat-taruhon-jual.html

Sinamot Sitombol 
Dimulana i dihata i pe Sinamot Sitombol, maksudna holan Sinamot i do, dohot maksud unang be sai dohot Paranak pasahathon Jambar namuhut tu Suhi ni Ampang na-Opat dohot tu Parjambar sihataan dijabu, asa Parborui ma pasahathoni sian Sinamot Sitombol i. (Lapatanna Sinamot napinasahat paranak termasuk ma di si angka goli-goli ni sinamot angka surungsurung dohot panandaion termasuk suhi ni ampang na opat, alai anggo panjuhuti dang termasuk dope di si). Hape anggo lapatanna ditingki on, nunga masuk tu Sinamot Sitombol, ima namosok, Panjuhuti tamba ni Dengke Simudur-udur, gabe Parboru ma patupahon sude sipatupaon di Pesta Unjuk sahat tu parburian, nda nunga gabe balik tangga ni balatuk, gabe ulaon ni Paranak diulahon Parboru (Hula-Hula manahu Parbasuan ni Boru) aha be lapatan ni : MARUNJUK dohot MANGAN TUHOR NI BORU.. Lapatan ni UNJUK ima mengunjuk (tunjuk) napinatupa ni Paranak laho pasangaphon Hula-Hulana Parborui. Hailaan Bolon do di Paranak molo so suman sipanganon na dipatupana ditingki Unjuk, hape di tingki on gabe hailaan ni Parboru do molo so suman sipanganon ditingki Unjuk, alana nunga Sinamot Sitombol /All In. Nda nunga gabe balik balatukna, Parboru patupahon Tudu-Tudu ni Sipanganon sipasahaton ni Paranak tu nasida Parboru ditingki Unjuk, ripe sonang ma (tau beres) Paranak ro tu parpestaan, manortori Paranak manjalo tumpak dihalojaon ni Hula-Hulana, gabe songon na soadong be lapatan ni Raja ni Hula-Hula ditingki Pesta Unjuk i. Jadi nunga tarbalik adat i ditingki on: Ndang Hir be hodok ni Paranak mandiori Sinamot Pangoli ni Anakna, gabe dohonon ma : HIR HODOK NI PARBORU LAHO PAMULI BORUNA. Molo najolo adong pandohan namandok: Mulak-mulak ditangga do anak ni na so marhepeng, anggo nuaeng on nunga balik: mago-mago di dalan ma sangap ni Hula-Hula Parboru napogos ala so marhepeng. Denggan ma didok roha anggo sipanganon di Pesta Unjuk unang be masuk tu Sinamot Sitombol, sipatupaon ni Paranak ma ala UNJUK ma goarna, molo inganan dohot dengke sipasahaton ni Hula-Hula Parboru tu Paranak, dohot dengke tu tondong ni Paranak sipatupaon ni Parboru ma i. Ala Catering nama patupahon sude sipanganon di Ulaon Unjuk, denggan ma nian Suhut Paranak dohot Suhut Parboru masipauneunean asa pemesanan Dengke ni Parboru dohot sipatupaon ni Parboru di namar-Une dipasada ma tu Catering ni Paranak. Teknik pelaksanaan, nasida ma masipasadaan, dilean Parboru ma hepeng tu Paranak tu keperluan ni Dengke pesanan nasida i. Adong dope gunana MARHATA SINAMOT ditingki Unjuk molo dung ma dihatai Sinamot Sitombol, ai marlapatan do i terserah di Parboru ma mangalean Jambar tu Ruhut ni Parjambar na Gok, ima Suhi ni Ampang naopat dohot tu angka Parjambar sihataan di Jabu ndang sihataan di alaman. Dohot istilah “SINAMOT SITOMBOL”, boi ma dohonon Ulaon Marhusip songon nadipamasa di Jakarta on, nunga be songon na “MARHATA SINAMOT” ai ma “SITOMBOL” goarna, antong aha be sihataan, so na adong be sipasahaton, nunga sidung sude di Parhusipon, molo tung pe di ulahon pasahat Panandaion na ditamba-tambai nama istilah ni i ai ndang dong binoto Jambar Panandaion di Adat Batak. Mauliate do dohononta tu angka dongan namangalehon parbinotoan dohot tingkina manurathon Buku Adat asa adong songon pedoman di hita angka namangargahon Paradaton ni Halak Batak na masa sian mulanai.. Ditingki nuaeng on manang napiga Buku Adat nijaha godangan do nasida manurat Adat Batak berpedoman tu namasa di Jakarta jadi mago keaslian/sumber ni Budaya Batak songon angka nasinurat ni angka dongan parbinoto di Paradatoni ditingki naparjoloi di Bona Pasogit, ima nasinurat ni donganta Mangaraja Asal, Raja Patik, Wismar Hutagalung dohot lan na asing dope. Dung mardomu hata ni Anak dohot Boru naeng mamungka parsaripeon nasida jala nunga parbinoto Natoras ni Boru dohot Natoras ni Anak dibuhul nasida ma tingki manang andigan Pihak Paranak ro mandapothon Pihak Parboru laho patotahon sangkap ni anakhon nasida: Patua Hata dohot manghatai Sinamot, dohot partingkian naberhubungan tu Ulaon sahat tu Unjuk. (ida hubungan ni Boru tu Boru songon naung pinatorang di ginjangi) Antong: anggo so adong be lapatan ni Namanungkun Boru, Manghusipi Sinamot dohot Namosok, Marhata/Pasahat Sinamot + Parjambar na Gok, Marunjuk, ala nunga dipasada sude ditingki Parhusipon dohot istilah Sinamot Sitombol /All In, nda ma dumenggan nian molo tapersingkat Ulaoni gabe boi dohonon “PESTA PAMASU-MASUON” sajo. ndang pola be suraton di hata ni Gokkon dohot Jou-Jou : Manjalo huhut pasahat Adat nahombar tu Ulaoni. 

RAMBU PINUDUN 
Tangkas do taantusi ia Adat Pamuli Boru Taruhon Jual manang didok doi RAMBU PINUDUN, namarlapatan doi sude: Inganan, Sipanganon, dohot sude haporluan ni Pestai gabe tanggung jawab ni Paranak. Ia Parboru holan mamboan Dengke Simudur-udur dohot Ulos Herbang sipasahaton tu Paranaki Di Inganan Parpestaan: Dung mulak sian Gareja, jala sahat tu inganan parpestaani parjolo ma masuk Penganten dohot Rombongan Suhut Paranak alai anggo Suhut Parboru dohot sude rombonganna/naniontangna ndang dohot dope masuk tu bagas. Dung sude simpan parhundul ni Hasuhuton Paranak dohot angka naniontang nasida, parjolo ma Paranak manggora : Hula-Hula, Tulang, Tulang Rorobot, Bona Tulang, Bona ni Ari, Hula-Hula na-Marhaha-maranggi dohot Hula-Hula ni Anak Manjae masuk tu bagas jala jaloon ni Suhut Paranak ma sude Hula-Hulai dohot tortor. Dung simpan masuk jala hundul sude hula-hula ni Paranak, bersiap ma Suhut Paranak laho manjalo haroro ni Rombongan ni Suhut Parboru. Rap masuk ma Suhut Parboru, Hula-Hula, Tulang, Tulang Rorobot, Bona Tulang, Bona ni Ari, Hula-Hula Namarhaha-maranggi, Hula-Hula ni Anak Manjae ni Parboru, ihut ma muse angka sisolhot naniontang ni Parboru masuk tu bagas dung manggora Paranak. Jadi sahali masuk do sude. Sude nabinoan ni Suhut Parboru dohot Rombongani, Dengke Siuk dohot Boras si Pir ni Tondi dipasahat ma tu Paranak alai anggo Dengke sipasahaton ni Suhut Parboru dipasimpan ma jolo diinganan na denggan paima tingki laho pasahathon. Di Jakarta nataulahon di Pesta Adat Pamuli Boru Taruhon Jual gabesongon ulaon Alap Jual do: Adong do namarsibuhabuhai, dungi di Gedung adong Hak ni Parboru manggora Hula-Hulana asa masuk tu Gedung jala Suhut Parboru muse namanjalo sude nabinoan ni Hula-Hulana. Pertanyaannya : Beha do pandapotmuna angka Dongan: Taulahon ma torus sisongoni manang taihuthon ma songon dia aslina ??? Panurat : Alm St. D.P. Hutagalung (Op. ni Si Salomo)

SELENGKAPNYA...